Poroşenko: Zelenskıynıñ «1+1» yayınında yapqanlarına seyirciler qıymet kesmeli

Ukraina prezidenti ve bu vazifege namzetini köstergen Petro Poroşenko aprelniñ 12-nde ekinci tur raqibi Volodımır Zelenskıynıñ aprelniñ 11-nde «1+1» telekanalındaki «Pravo na vladu» programmasınıñ yayınında yapqanlarına qıymet kesmeycek, dep bildirdi. 

«Bunı izaatlamaq kerekim, dep tüşünesiñizmi? Eminim, bu programmanı baqqanlar er şeyni kördi ve özleri netice çıqaracaq. Eminim, olar netice çıqarğanlar ve qıymet keskenler», – dedi Poroşenko Berlindeki matbuat konferentsiyasında.

Aprelniñ 11-nde aqşam prezident namzeti ve şimdiki devlet yolbaşçısı Petro Poroşenko «1+1» kanalınıñ studiyasına «Pravo na vladu» programmasınıñ yayınına keldi. Onıñ kelecegi evelden ilân etilmegen edi. Poroşenkonıñ aytqanına köre, o, raqibi Volodımır Zelenskıynı munaqaşağa davet etmek içün keldi. Daa soñra Zelenskıy yayınğa telefon vastasınen qoşuldı, amma munaqaşalarnen bağlı qısqa bir tartışmadan soñ şöyle dedi: «Şimdi men bitirem. 19-nda. «Olimpiyskıy» milliy sport kompleksinde. Noqta. Körüşkence». Soñra onıñnen bağ üzüldi.

Bu yayından soñ «1+1» baş müdiri Oleksandr Tkaçenko Poroşenko «yayınğa davetsiz keldi», dep bildirdi. Şu sebepten telekanal oña qarşı mahkemede dava açtıracaq. Prezident memuriyeti ve Petro Poroşenkonıñ saylav ştabı Tkaçenkonıñ bu aytqanlarını daa izaatlamadı.