Aksenov, Milletlerara munasebetler devlet komitetiniñ adından sürgün etilgen vatandaşlar ibaresini alıp taşladı
Qırımnıñ Rusiye akimiyeti Milletlerara munasebetler ve sürgün etilgen vatandaşlar devlet komitetiniñ adını deñiştirdi. Müessise adında sürgünlik sözü keçmeycek. Bu aqta salı künü, oktâbrniñ 15-nde, derc etilgen Kreml kontrolindeki Qırım yolbaşçısı Sergey Aksenovnıñ buyruğında aytıla.
«Qırım Cumhuriyetiniñ Milletlerara munasebetler ve sürgün etilgen vatandaşlarnıñ işleri devlet komitetini Qırım Cumhuriyetiniñ milletlerara munasebetler işleri devlet komiteti olaraq adlandırmaq», – dep aytıla vesiqada.
Al-azırda Kreml kontrolindeki Qırımnıñ Milletlerara munasebetler devlet komitetiniñ yolbaşçısı Lenur Abduramanov ola.
Daa evel sentâbr ayında Qırım parlamenti Yuriy Gempel («Yedinaya Rossiya» fraktsiyası) yolbaşçılıq etken «milletlerara munasebetler ve halq diplomatiyası meseleleri» komitetini qurğanda «sürgün etilgen» ibaresini alıp taşlağan edi.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.