Macron, Ukrainağa kelmege razı oldı – prezident Zelenskıynıñ ofisi

Ukraina prezidenti Volodımır Zelenskıynıñ ofisi bildirgenine köre, Frenkistan prezidenti Emmanuel Macron Ukrainanı ziyaret etmege razı oldı. Bu yanvarniñ 11-nde kerçekleştirilgen eki prezidentniñ telefon subetinden belli oldı, dep haber ete Ofis.

«Devlet yolbaşçıları eki taraflı dialognı devam ettirmege añlaştı. Bundan ğayrı, taraflar yaqın vaqıtta Ukraina-Frenkistan-Almaniya formatında üç taraflı telefon subeti aqqında kelişti», – dep bildirdi Zelenskıynıñ ofisi, dep haber ete Azatlıq Radiosı.

Frenkistan lideriniñ Ukraina ziyareti ne vaqıt olacaq aydınlatılmadı.

Qayd etilgenine köre, subet vaqtında Zelenskıy ve Macron İranda Ukraina halqara ava yolları uçağınıñ tüşürilmesini tahqiq etüv işbirligini muzakere etti, uçaqnıñ «qara qutularını» talil etmek içün Frenkistan mütehassıslarınıñ celp etilüvi aqqında añlaştı ve «normand formatında» olğan körüşüvniñ añlaşmalarını yerine ketirmek içün atılacaq adımlarnı laf etti. 

Zelenskıy ve Macron 2019 senesi dekabrniñ 9-nda Parijde körüşti, anda Frenkistan, Almaniya, Ukraina ve Rusiye liderlerini körüştirgen «normand formatı» sammiti olıp keçken edi.

Hatırlatamız, Almaniya kantsleri Angela Merkel cumaertesi künü, yanvarniñ 11-nde, Moskvağa Rusiye prezidenti Vladimir Putinnen muzakere keçirmege keldi.

Yaqın Şarqtaki vaziyet İran generalı Kasem Suleymani öldürilgen Amerika ava ücüminden soñ kerginleşti. Böylece, regionda yañı silâlı zıddiyet telükesi peyda oldı. İran quvetleri 176 insan bulunğan Ukraina yolcu uçağını «hata yapıp» tüşürgen soñ vaziyet kene kerginleşti.