Bu ekinci ceza. Advokat Aqyardaki «Hizb ut-Tahrir davası» mabüsleriniñ ükmü aqqında tarif etti
Aqyardaki «Hizb ut-Tahrir davasınıñ» mabüsleri Rustem Vaitov ve Nuri Primov Rusiye apsinden azat etilgen soñ daa 8 yılğa memuriy nezaret altına alındı. Bu aqta qırımlı advokat Lilâ Gemeci Qırım.Aqiqatqa bildirdi.
«Aslında, Nuri ve Rustem içün ekinci ceza bu. Onıñ belli sıñırları bar, ekisiniñ de belli yerde, qayd olğan yerde ya da yaşağan yerde bulunmasınen bağlı, belli areket yapmaları sıñırlana. Aqmescit rayonını, Qırımnı terk etmek, açıq tedbirlerni ziyaret etmek yasağı bar. Yani politsiyanıñ haberi olmasa, insan bir yerge barıp olamay», – dep tarif etti advokat.
Gemeciniñ aytqanına köre, böyle sıñırlar Nuri ve Rustemniñ yaşayışına pek tesir etecek.
«Rustemniñ qızı balalıqtan saqat, onı er vaqıt tibbiy klinikalarğa alıp ketmek kerek. Olar Aqmescit rayonınıñ tışında bar. Çaresiz bir vaziyet: bala yaramadı, onı hastahanege alıp ketmek kerek, amma başta İç işler nazirliginiñ hadimlerinden izin alacaqsıñ. Şimdi tek yaşağan ve qayd olğan yerini deñiştirmek içün muracaat bere bilemiz», – dedi o.
Gemeci, neticede Rusiye «Hizb ut-Tahrir» qanunlarını yımşatmağa imkân olur, dep ümüt ete.
Rustem Vaitov «terror teşkilâtınıñ faaliyetinde iştirak etkeninde» qabaatlanıp, beş yıl koloniyada yattı. Yanvarniñ 22-nde apis cezasınıñ müddeti yekünlengeninen onı azat ettiler. Aqyardaki «Hizb ut-Tahrir davasınıñ» ekinci mabüsi Nuri Primov dayanvarniñ 22-nde qomşu Rusiyeniñ Mariy El Cumhuriyetindeki Rusiye koloniyasında azatlıqqa çıqtı.
2016 senesi sentâbr ayında Rostov-na-Donu şeeriniñ Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davası» boyunca qabaatlanğan aqyarlılar Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.