Ukraina milliy bankı qırımlılarnıñ maliyeviy hızmet irişimini sadeleştire
Milliy bank, işğal etilgen Qırımda ve Aqyarda qayd olğan ya da anda yaşağan Ukraina vatandaşlarınıñ maliyeviy hızmet irişimini qolaylaştırmaq içün uquqiy resmiyetçilikni lâğu ete. Bu aqta Milliy banknıñ matbuat hızmeti bildirdi.
«Bu maqsadnen Qırımda qayd olğan Ukraina vatandaşlarına qarşı valüta mecburiyetlerini qullanuvnen bağlı mahsus qaideler lâğu etile ve olarnıñ rezidentlik statusı ğayrıdan tiklene. İşbu yımşatuvnıñ maqsadı böyle vatandaşlarnıñ Ukraina maliyeviy müessiselerinde bank esabını ya da depozitni açuv kibi esas hızmetlerni qolaylaştırmaq ola», – dep aytıla haberde.
Qayd etilgenine köre, eñ yaqın vaqıtta banklar esaplar açılğanda böyle müşterilerniñ identifikatsiyası ve verifikatsiyası hususiyetlerinen bağlı qoşma açıqlama alacaq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.