Qırımda «İslâmovnıñ davasında» mahkeme: FSB hadimi oturışuvda ekspert olaraq iştirak etti
Kreml kontrolindeki Qırım Yuqarı mahkemesiniñ ATR qırımtatar telekanalınıñ saibi Lenur İslâmovğa qarşı açılğan dava oturışuvında qabaatlayıcı delillerini taqdim etmege devam ete.
Advokat Aleksey Ladinniñ bildirgenine köre, mahkemede FSB mütehassısı Anna Korotkova çıqışta bulundı, o, Rusiye FSBsiniñ hadimi de ola.
O, İslâmovnıñ halqara uquqqa köre Qırım Ukrainanıñ ayırılmaz bir parçası ola ve qaytarılmalı degen intervyüsınıñ ekspertizasını yaptı.
«(Ekspertiza keçirilgen – QA) FSB institutınıñ adresini aytmağa razı olmağan ekspert tek poçta indeksini ayta bilgenini dedi, lâkin onı da aytmadı. Ekspertniñ ekspertizanı belgilegen şahıs ve organdan mustaqil olmasını talap etken «Devlet ekspertizası» qanunına nasıl uya sualime Korotkova özüni FSB hadimi ve ekspert olaraq ayıra dedi. Lâkin, añlağanıma köre, biz mahkemede ekspertni degil de, FSB hadimini sorğuğa çektik, çünki o, pasportını köstermeyip, iş şeadetnamesini kösterdi», – dedi advokat.
Onıñ aytqanına köre, Korotkovanıñ ekspertiza vaqtında qullanğan usullarınıñ «işte qullanılacaq» işareti bar ve olar açıq şekilde bir yerde yoq. Mahkeme imaye tarafına bu usullarnı istemesine ve tedqiq etmesine izin bermeyip, mahkeme FSB institutınıñ adresini bilmey, dedi.
Nevbetteki mahkeme oturışuvları iyülniñ 7-nde ve 8-nde olacaq.
Rusiye kontrolindeki Qırım Yuqarı mahkemesi ATR qırımtatar telekanalınıñ saibi ve 2015 senesi Qırımnıñ vatandaş qamaçavınıñ faal iştirakçilerinden biri Lenur İslâmovğa qarşı davanı temelden baqıp başladı. Mayısnıñ 25-nde onı qabaatladılar.
«Krımenergo» müessisesi, 2015 senesi Herson vilâyetinde elektrik naqil hatlarınıñ patlatıluvı neticesinde blackouttan körgen müessise zararı 1 mlrd rubleden çoq oldı, dep bildirdi. Rusiye tahqiqatçıları elektrik naqil hatlarınıñ patlatılmasında ATR telekanalınıñ saibi Lenur İslâmovnı qabaatlay.
İslâmovnıñ Qırım.Aqiqatqa bildirgenine köre, o, Rusiye kontrolindeki Qırım Yuqarı mahkemesiniñ oturışuvlarında şahsen iştirak etmeycek. Qırımda oña qarşı esnasnı adaletsiz cezalav dep adlandırdı.
2015 senesi oktâbr ayında Rusiye FSBsi Lenur İslâmovğa dava açıp, onı federal qıdıruvğa ilân etti.
2015 senesi dekabr ayında Rusiye kontrolindeki Qırım mahkemesi İslâmovnıñ yarımadadaki mal-mülkini tevqif etti. Dekabrniñ 21-nde Qırımnıñ Rusiye prokurorı olğan Natalya Poklonskaya İslâmov ğıyabiy şekilde diversiyalarda qabaatlandı, dep bildirdi. İslâmov bu qararlarnı qanunsız dep adlandırdı.
Oña ait ATR telekanalı 2015 senesi aprelniñ 1-nden başlap işğal altındaki Qırımda yayınlarını toqtattı. Telekanal Kyivge köçip, 2015 senesi iyünniñ 17-nde yayınlarını yañıdan başlattı.