Qırım akimiyeti Hanlar sarayınıñ arem «rekonstruktsiyası» vesiqalarına 10 mln ruble sarf etecek

Qırımnıñ Rusiye akimiyeti Bağçasaraydaki Hanlar sarayı areminiñ «rekonstruktsiyası» boyunca ilmiy-leyha vesiqalarını azırlaycaq yekâne tış hızmetçisini belgiledi. İş fiyatı 10,6 mln rubleden çoq olacaq. Bu aqta Qırımnıñ Rusiye yolbaşçısı Sergey Aksenovnıñ buyruğında aytıla.

«RosKapStroy» federal muhtar müessisesini Qırım Cumhuriyeti, Bağçasaray, Reçnaya soq., 133 adresi boyunca «Arem» medeniy miras obyektinde «Hanlar sarayı» medeniy miras obyektini saqlav işleri» federal emiyetli medeniy miras obyektlerini saqlav işlerini keçirmek içün ilmiy-leyha vesiqalarınıñ azırlamasınen bağlı devlet añlaşması boyunca yekâne icra etici olaraq belgilemek», – dep aytıla vesiqada.

Vesiqada qayd etilgenine köre, leyha-masrafname vesiqaları 2021 senesi dekabr ayına qadar azır olmalı.

Rusiye prezidenti Vladimir Putin Federatsiya Şurasınıñ azalarına muracaat etip, Rusiyedeki medeniy miras obyektleriniñ «restavratsiyası» qoşma para bermege emir etti. Cedvelde işğal altındaki Qırımnıñ eki sarayı bar – Hanlar ve Vorontsov sarayları. 

Yarımadanıñ Rusiye akimiyeti Han sarayınıñ beş obyektini, hususan Graf korpusını ve Han aşhanesini tamir ettirmege istegen edi. İş fiyatı 265 mln ruble olaraq esaplanğan edi. Qırımnıñ Rusiye yolbaşçısı Sergey Aksenov Bağçasaraydaki Han sarayınıñ «restavratsiyası» 2021 senesi bitirilecek, dep ayttı.

Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.

2016 senesi iyül ayında Qırımnıñ Rusiye medeniy mirasnı qoruv devlet komiteti, Han sarayınıñ «restavratsiya» işlerini keliştirdi. Akimiyet bunı «qazağa qarşı işler» dep adlandırdı.

Qırım Muhtar Cumhuriyetiniñ milletlerara munasebetler ve sürgün etilgen vatandaşlarnıñ işleri komitetiniñ sabıq reisi, qırımlı faal Edem Dudakovnıñ bildirgenine köre, «rekonstruktsiya» vaqtında Hanlar sarayınıñ tahta tosunları yoq etildi: bir qısmı pıçıldı, diger alıp ketirildi. Bundan ğayrı, Dudakovnıñ malümatına köre, restavratsiya işlerini yapqan tış hızmetçi şirket eski kiramet yerine ispan üslübindekini qoymağa planlaştıra.

Kyiv, Rusiye akimiyetiniñ Hanlar sarayında keçirgen «restavratsiyanı» çoq tenqit etken edi. Ukraina medeniyet nazirligi bu işler sebebinden Hanlar sarayınıñ baş korpusı yoq etile bile, dep bildire.