Qırımda qırımlı Ablâkimovnıñ davası boyunca mahkemede qabaatlav tarafınıñ şaatları sorğuğa çekildi

Rusiye kontrolindeki Sudaq şeer mahkemesinde fevralniñ 10-nda «cinayet aqqında bildirmegeninde» qabaatlanğan Qırımdaki Rusiye Fevqulâde vaziyetler hızmetiniñ hadimi Ayder Ablâkimovnıñ davası boyunca oturışuvda eki operativ vekâletli ve şaat sorğuğa çekildi. 

Bu aqta «Qırım birdemligi» cemaat birleşmesi Qırım.Aqiqatqa haber etti.

Advokat Safiye Şabanova qabaatlav şaatları Ablâkimovnıñ tintüvinde bar edi, dep bildirdi.

«Şaat aytqanlarını qarıştırdı. Tintüv vaqtında bar edi, doğrusını aytmağa tırışqanından şübhelenmeymiz. Ayderden Dadacanov aqqından soramağanlarını ayttı. Prokuror bütün aytqanlarını tüzetmege tırıştı, biz prokurornı tenbiledik. Mahkeme buña qulaq asmayıp, prokuror daa doğru malümat almağa tırışa, dep bildirdi», – dep ayta imayeci.

Onıñ bildirgenine köre, operativ vekâletlilerniñ sorğusı tam olmadı.

«Operativ vekâletlilerni aytsaq, bir malümat berip olamadılar. Dadacanovnıñ müvekkilime yazğanını nasıl bildiler, Iraqta bulunamı ve ilâhre aytılmadı. Sorğu pek sathiy oldı», – dedi Şabanova.

Mahkemede gizli şaat da sorğuğa çekilecek edi, amma o kelmedi. Nevbetteki mahkeme oturışuvı martnıñ 15-ne belgilendi.

2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.

Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.

Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.

2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.