«Dnipro suvuna ihtiyac yoq, başqasınıñ suvu kerekmey» – Qırım matbuatınıñ taqrizi

Qırım gazetleri yarımadınıñ suv meseleleri, Şimal Qıırm kanalınıñ vaziyeti ve süt sahteciligi aqqında yazalar. 

«Krımskaya gazeta» yarımadanıñ suv teminatına bağışlanğan aftalıq neticeleri aqqında yaza. Rusiye nezaretinde olğan «Voda Krıma» işhanesiniñ başı Vladimir Bajenovnıñ sözlerine köre, suv anbarlarına suv kelmesi ile maqtanacaq şey şimdilik yoq»: «Bugünde künlük alınmasından tekaran ziyadedir. Amma keçken afta devamında ğarbiy tarafta 91,5 biñ metr kub alğan edik – tulumba cihazlarını qullandıq, bunıñ yardımınen Aqmescit suv anbarlarında orta qararınen suv alınmasını 32-35 biñ metr kub azlaştırdıq». 

Eñ yaqın vaqıtta Voda Krıma işhanesiniñ reberligi kurort mevsimine suv berüv cedvelini taqdim etecek: : «İnsanlarnıñ suvğa künlük ihtiyacalarını tam şekilde qarşılamaq içün, bu işni yapmalımız. Cedveller tam olmalı», – dedi  Qırımnıñ Rusiye başı Sergey Aksönov. ​

«Krımskiye izvestiya» «Dnipro suvuna ihtiyac yoq, başqasınıñ suvu kerekmey» materialında Şimal Qırım kanalınıñ vaziyeti aqqında ikâye ete. Neşir obyektniñ quruluv ikâyesi aqqında aytıp bere ve atta yedi yıl soñra kanalda suv olmağanınıñ müsbet taraflarını da qayd ete: «Şimal Qırım kanalınıñ qurumasınıñ da müsbet tarafları bar. Misal olaraq, yerastı suvlarınıñ seviyesi eksildi, bu ise topraqnıñ tuz rejimine müsbet tesir etti. Bundan ğayrı, alimler hatırlattı ki, Çernobl AES yüz bergen qaza neticesinde radionuklidler Şimal Qıırm kanala boyunca Dnipro suvunen Qırım havuzlarına kele edi. 2014 sensi kanal qapatılğan soñ, Cumhuriyetniñ ögollerinde suv kirlenmesi 2018 senesine yaqın 305 qat eksildi!» – dep yaza gazeta. 

«Krımskaya pravda» «Süt sahtelicigini masa başına?» materialında, yarımadada sahtecilikke qarşı nasıl kureşkenlerini aytıp bere. Neşriniñ malümatına köre, muntazam teşkerüvler eñ müim müessiselerde süt mahsulatınıñ keyfiyetini bayağı eyilleştirmege yardım etken: hastahaneler, pansionatlar, bala bağçaları ve mektepler. Aynı zamanda, 19 Rusiye bölgesinde federal ve regional ağlarınıñ  büyük tükânlarında sütniñ ve süt mahsullarnıñ aman yarısınıñ (45%) müddeti keçken. Bu, «Obşçestvennaya potrebitelskaya initsiativa» teşkilâtı tarafından keçirilgen tetqiqatnıñ neticeleri. 

Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.

Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.

2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.

Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.

Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.

Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.

BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.

Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.