Dmıtro Kuleba: «Qırım platforması – Qırımdaki insanlarğa aqlarını qaytarmaq içün bir yoldır»

Ukraina Tış işler naziri Dmıtro Kuleba «Qırım platformasınıñ» sammitini Qırım sakinlerine uquq ve azatlıqlarını qaytarmaq içün bir yol adlandırdı. Bunı o Twitter saifesinde yazdı.

«Qırım platforması, Qırımdaki insanlarğa tasilden din serbestliginece aqlarını qaytarmaq içün bir yoldır. Em de halqara bank sistemalarını qullanmağa, mahkemelerge mülkiyetini qorçalamağa, vizasız rejiminden faydalanmağa, öz telekanlanı ve öz ükümetini saylamağa imkân berecek», – dep yazdı Kuleba.

Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.

Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.

Ukraina Tış işler naziriniñ birinci muavini Emine Ceppar «Dom»telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.