Almaniyada 130-dan ziyade adam suv basuvınıñ qurbanı oldı

Almaniyanıñ ğarbında olğan suv basuvı neticesinde eñ az 133 insan elâk oldı, dep haber ete Azatlıq Radiosı. Berilgen malümatqa köre 90 adam zarar körgen, 620-ge yaqın yaralanğan.

Şimaliy Reyn-Vestfaliya topraqlarında 43 adam öldi. Yerli başlıqlar bildire ki, bu elâk olğanlarnıñ daa soñki sayısı degil. Onlarnen yerli sakin alâ daa tapılmağan.

Qıdıruv-qurtaruv işleri ve mahv etilgen infraterkipniñ ğayrıdan tiklenilimesi devam ete. Suv basuvınıñ aqibetleriniñ yoq etmek içün mahsus hızmetlerden ğayrı daa polis, arbiyler ve göñülliler iştirak ete.

Akimiyet bu afatta elâk olğan insanlarnıñ sayısı yıllar devamında eñ büyük oldı, dep bildire. Sebep küçlü yağmurlar oldı, özenler taşıp ketti. Meskün yerleri yoq etildi, yollarda areket blok etildi. Şimaliy Reyn-Vestfaliya ve Reynland-Pfalts topraqlarınıñ sakinleri kütleviy şekilde tahliye etile. İyülniñ 16-nda saba erte Erftştadt şeerinde bir qaç ev yıqıldı, bazı yerli sakinler ise ihtarlarğa baqmadan evlerine qaytacaq edi.

Şimaliy Reyn-Vestfaliya parlamenti acele toplaşuv ötkerecek.

Almaniya iç işler naziri Horst Zeyehofer federal ükümet zarar körgen vilâyetlerge tez vaqıtta maddiy yardım köstermege niyetlene, dep bildirdi. Yardım teklifi iyülniñ 21-nde baqıla bile.

«Bu facia sebebinden canını bergen er keske yanam. Tam raqamnı daa bilmeymiz, amma pek büyük olacaq», – dep ayttı bu künleri ABDde iş ziyaretinde olğan Almaniya kantsleri Angela Merkel. Onıñ aytqanına köre, suv basuvınıñ büyükligi ve aqibetleri onı şaşırttı. Kantsler ğayıp olğanlarnı tapmaq içün er şey yapılacaq, dep söz berdi.

Blok etilgen yollar, Eyfel regionında bozulğan telefon ve internet bağı qıdıruv-qurtaruv işlerini zorlaştıra. Bazı köyler virane oldı, evler selge dayanamadı.

Qomşu Belçikada da suv basuvında elâk olğanlar bar. Anda eñ az 12 insan öldi.

Avropa komissiyasınıñ yolbaşçısı Ursula Gertrud von der Leyen cumaaqşamı künü faciağa oğrağanlarğa yardım etilecek, dep bildirdi.