Dmıtro Kuleba: BM Baş Assambleyasınıñ 76-ncı sessiyasında Ukrainanıñ esas prioriteti – Qırımnıñ işğalden qurtarıluvı
Ukraina Tış işler naziri Dmıtro Kuleba BM Baş Assambleyasınıñ 76-ncı sessiya yolbaşçısı, Maldivlerniñ tış işler naziri Abdulla Şahid ile telefonda laf etip, bu sessiyada Ukraina içün esas prioritet Qırım ve Donbasnıñ işğalden qurtarıluvı ola, dep bildirdi.
Bu aqta Ukraina Tış işler nazirliginiñ resmiy saytında aytıla.
«Avgustnıñ 23-nde Kyivde Qırımnıñ işğalden qurtarıluvı içün halqara ğayretlerni birleştirgen Qırım platformasınıñ açılış sammiti ötkerildi. Biz BM tarafından onıñ işine er taraflama qoltutulacaq, dep işanamız, çünki Qırım platformasınıñ esas maqsadı – Qırımnıñ qaytarıluvıdır. Bu BM Nizamnamesine olğan ürmetni ğayrıdan tiklep, halqara uquqnıñ bozuluvlarını toqtatır», – dedi Kuleba.
Ukraina prezidentiniñ matbuat kâtibi Sergey Nikiforov «Dom» telekanalınıñ yayınında Volodımır Zelenskıy BM Baş Assambleyasınıñ 76-ncı sessiyasında «Qırım platformasınıñ» işine iştirakçi memleketlerniñ qoşuluv meselesini kene kötere bile, dep bildirdi.
Ukrainanıñ BM daimiy vekili Serğiy Kıslıtsâ avgustnıñ 23-nde Kyivde «Qırım platformasınıñ» açılış sammitinde iştirak etip olamağan devletlerni sammit neticesinde imzalanğan Beyannamege qoşulmalarına çağırdı.
Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».