«Hizb ut-Tahrir davası»: advokatlar mahkemeden gizli şaatlarnıñ aqlı yerinde olıp olmağanını teşkermesini rica ete
Rostov-na-Donu Cenübiy okrugınıñ arbiy mahkemesinde noyabrniñ 10-nda Aqmescitteki ekinci «Hizb ut-Tahrir davasınıñ» daa bir oturışuvı olıp keçti. Bu aqta «Qırım birdemligi» cemaat birleşmesi haber etti.
«İmaye, Aqmescitteki ekinci «Hizb ut-Tahrir davasınıñ» delillerini Cenübiy okrugınıñ arbiy mahkemesine berdi, qırımtatarları Remzi Bekirov, Riza İzetov, Şaban Umerov, Raim Ayvazov, Farhod Bazarov Hizb ut-Tahrir islâm siyasiy firqası ile alâqaları bar olğanında qabaatlana. Advokatlar mahkemege gizli şaatlarnıñ malümatını teşkermek muracaatında bulundı», – dep aytıla haberde.
Uquqçılar, gizli şaatlar uquq kemalındamı ve yapqanları içün cevap bere bilemi ögrenmek içün olar aqqında malümat berilmesi içün muracaat etti.
«İmaye, bu şahıslar mahsus hızmetlerge bağlı, dep tüşüne, çünki çoqusı cevaplarında diger şaatlıqlarına zıt kelgen malümat berdi», – dep qayd etti advokat Nazim Şeyhmambetov.
Yarın mahkeme dava mabüsleriniñ apiste qaluv müddetinen bağlı qarar çıqarmalı.
Avgust ayında Rostov-na-Donu Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» mabüsleri jurnalist Remzi Bekirov, aq qorçalayıcı Riza İzetov, faaller Farhod Bazarov, Raim Ayvazov, Şaban Umerovnıñ SİZOda qaluv sıñırlav tedbirlerini dekabrniñ 15-ne qadar uzattı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.