Qırımdaki mahkeme «Qırım birdemligi» koordinatorınıñ 2012 senesi paylaşqanları içün apiske alınuvını «qanunğa uyğun» dep tanıdı
Rusiye kontrolindeki Qırım Yuqarı mahkemesi «Qırım birdemliginiñ» koordinatorı Mustafa Seydaliyevniñ 2012 senesi içtimaiy ağlarda paylaşqanları içün memuriy apis cezasını qanunğa uyğun dep tanıdı. Bu aqta advokat Lilâ Gemeci Qırım.Aqiqatqa bildirdi.
«Seydaliyev mahkemege ketirildi. O, iştirak etti ve delillerini ayttı, 2012 senesi Qırımda diger devletniñ yurisdiktsiyası olğanda paylaşuv yapqanını, şu sebepten mesüliyetke çekilüvi qanunsız ola, dep ayttı. 2016 senesi saifeni açıp olamadı ve (paylaşqanlarını – QA) silmege imkânı olmadı», – dedi Gemeci.
Onıñ aytqanına köre, mahkeme imayeniñ delillerini qabul etmedi ve Seydaliyevniñ memuriy apis cezası qararını deñiştirmedi.
Gemeci, dekabrniñ 17-nde aqşam Seydaliyevniñ memuriy apis cezası bite ve o, izolâtordan çıqmaq kerek.
Rusiye kontrolindeki Qırımnıñ İslâm Terek rayon mahkemesiniñ qararlarınen Seydaliyev Rusiye Memuriy uquq bozuvları kodeksiniñ 20.29 maddesine istinaden (Ekstremist malümatnı azırlav ve tarqatuv) qabaatlı tanıldı, oña er bir protokol içün 10 kün memuriy apis cezası berildi.
Seydaliyev 2012 senesi «VKontakte» içtimaiy ağında Rusiye ekstremist malümatlar cedvelinde olğan videonı derc etkeninde qabaatlandı.
«Qırım birdemliginiñ» koordinatorı dekabrniñ 7-nde birinci memuriy apis cezası bitken soñ azat etilmedi.