"Rusiye siyasiy mabüs Prıhodkonın sağlığı aqqında malümat bermey, onı öz vatandaşı saya" – Denisova
Ukraina Yuqarı Radasınıñ insan aqları vekâletlisi Lüdmila Denisova Qırımlı siyasiy mabüs, Ukraina tarafdarı faal Oleg Prıhodkonıñ Rusiyede "Rusiye vatandaşı" sayğanları sebebinden Rusiye ombusmanı Tatyana Moskalkovadan onıñ sağlığı ili bağlı kerçek malümat ala bilemegenini bildirdi.
Bunı Denisova Qırım.Aqiqat Radiosınıñ yaynında bildirdi.
"Oleg Prıhodko ile bağlı Tatyana Moskalkovağa muracaat etkenim birinci kere degil. Endi defalarca alğanımız cevapnı bekleymiz. Sözü-sözüne böyle yazılacaq: "Rusiye vatandaşı Oleg Prıhodkoğa köstergen diqqatıñız içün sağ oluñız". Olar onı Rusiye vatandaşı sayalar, bunıñ içün sağlığınıñ vaziyetini tasdıqlağan ya da red etken malümat bermeyler", - dedi Denisova.
İhtimal ki, Moskalkovanıñ cevabında Oleg Prıhodkonıñ baquv şaraitiniñ ve tibbiy teminatınıñ "Rusiyeniñ ameldeki qanunlarına ve halkhara standartlarğa uyğun olğanı" yazılacaq, dep qoştı Denisova.
Bundan ğayrı, Denisova, "Ukrainanıñ bütün vatandaşlarınıñ şartsız keri qaytarılmasını ve yüz bergen qılınuvlarnı, şu cümleden Oleg Prıhodkonıñ iskencelerge oğratılmasını toqtatmağa" talap etti.
Rusiyeniñ Vladimerskiy tsentral apishanesinde ceza çekken Qırımlı siyasiy mabüs Oleg Prıhodkoğa qarşı "FSB hadimini aqaretlegeni" içün yañı cinayet davası açılğan. Bunı qızı Natalya Şvetsova bildirdi.
Evel Oleg Prıhodkonıñ qızı Qırım.Aqiqatqa babasına qarşı etilgen qılınuvlar ve iskenceler aqqında aytıp bergen edi.
2021 senesi küzde Advokat Sergey Legostov Rusiyede mahküm etilgen ukrain tarafdarı Oleg Prıhodkonen körüşken soñ, anda oña yaramay munabette olğanlarını bildirdi.
Rusiyede mahküm etilgen Qırım sakini, ukrain tarafdarı Oleg Prıhodkonıñ ailesi evel çıqarılğan üküm çerçivesinde mahkeme tarafından oña berilgen 200 biñ ruble cöremeni tam şekilde ödedi.
Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.