Qırımda Rusiye uquq qoruyıcıları qırımtatar milliy areketiniñ veteranı Abdureşit Cepparovnıñ evini tinte
Qırımda Rusiye uquq qoruyıcıları qırımtatar milliy areketiniñ veteranı ve aq qorçalayıcı Abdureşit Cepparovğa tintüv keçirmege keldi. Bu aqta «Qırım birdemligi» cemaat birleşmesi haber etti.
«Bugün saba 7-de Sarı Su mikrorayonına mahsus bölük hadimleri olğan bir avtozak, eki beyaz GAZel aq qorçalayıcı Cepparov Abdureşitniñ evini tintmek içün kirdi. Al-azırda, saat 8:20-de, tintüv daa devam ete. İçeride neler ola – belli degil», – dep tarif etti yerli sakinlerden biri.
Adise yerine advokat Emine Avamileva keldi, amma uquq qoruyıcılar onı evge kirsetmedi. Ana-babasına qoltutmağa kelgen Cepparovnıñ qızına bile kirmege izin bermeyler.
«Keçken yılları Qarasuvbazar rayonınıñ prokuraturası aq qorçalayıcını «ekstremizm ile küreş qanunlarınıñ bozulmaycağı aqqında» tenbilemege istegen edi», – dep qayd ete «Qırım birdemligi».
Advokat Nikolay Polozovnıñ bildirgenine köre, 2014 senesi Qırımda Rusiye uquq qoruyıcıları Cepparovnıñ oğlu ve torunını hırsızladı. Olarnıñ bulunğan yeri aqqında alâ daa bir haber yoq. Hırsızlav tahqiqatı toqtatıldı.
Martnıñ 5-nde Rusiye FSBsi Qırımda «qırımtatar batalyonına» kirgen Ukraina vatandaşı aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.