Qırımda faal Sergey Akimov maşnasındaki cenkke qarşı plakat içün "Rusiye ordusını itibardan tüşürüv" ile qabaatlandı

Qırımda faal Sergey Akimov maşnasındaki cenkke qarşı plakat içün "Rusiye ordusını itibardan tüşürüv" ile qabaatlandı. Bunı Akimov Qırım.Aqiqatqa bildirdi. 

Martnıñ 30-nda Akimovnı Qırımdaki Rusiye polisiniñ bölügine ketirdiler. O, Ukrayinada "Rusiye Silâlı Quvetleriniñ qullanuvını itibardan tüşürmek içün yönetilgen açıq areketler" ile qabaatlandı. 

Faalni maşnasına cenkke qarşı plakat yapıştırğanı ile qabaatladılar. 

Haber etilgeni kibi, Akimovğa 30 biñden 50 biñge qadar para cezası berile bile. 

Memuriy progtokol boyunca qararnı Rusiyeniñ nezaretinde olğan Aqmescitniñ Merkeziy rayon mahkemesiniñ mahkemecisi çıqarğan. 

Rusiyeniñ nezaretinde olğan Qurman rayon mahkemesi saba Qırımda küyeçirilgen tintüv vaqtında yaqalanğan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi. O, Rusiyeniñ Ukrayinağa cenki vaqtında "Rusiye ordusını itibardan tüşürüv" ile qabaatlandı.

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kıyiv ve Rusiye sıñırına yaqın bir qaç vilâyet merkezini sarıp almağa tırışa.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net​. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.