Ukrayinada barışıqqa irişmek içün er angi teşebbüsler "çatışmanı buzlatmamalıdır" – Kuleba
"Er angi stsenariy içün masada farqlı çezüvler olmalıdır. Poloniya ükümeti tarafından berilgen teşebbüsler faydalıdır. Poloniya NATO azasıdır ve Alyansnıñ içinde türlü teşebbüslerni ilerilete bilir. Amma şimdi belli bir memleket tarafından seslendirilgen er angi teşebbüske yalıñız bir şartımız bar: bu teşebbüsler çatışmanı buzlatmamalıdır", - dedi Kuleba.
Nazir qayd etti ki, Rusiyeniñ fevralniñ 23 itibarınen saip olğan pozitsiyalarğa keri donmeli ve bu Ukrayina içün printsipialdir.
"Rusiye fevralniñ 23 itibarınen saip olğan pozitsiyalarğa keri donmeli. Bu bizim içün printsipialdir. Bitaraf statusınıñ qayd etilmesine yardım etken iç bir teşebbüs Ukrayina menfaatlarına uyğun olmay", - dep qoştı nazir.
Evel Poloniya Ukrayinada barıştırıcı missiyanı teşkil etmege teklif etken edi. Yaqında olıp keçken NATO sammitinde bu teşebbüs muzakere etilmedi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.