Rusiye Mudafaa nazirligi Mariupoldeki "Azovstal" zavodını nezaretke alğanını bildirdi
Nazirlikniñ malümatına köre, Mudafaa naziri Sergey Şoygu artıq Rusiye prezidenti Vladimir Putinge zavodnıñ "tam azat etilmesi" aqqında haber bergen.
"Azovstal" territoriyasında olğan Ukrayina arbiyleri mayısnıñ 16-nda teslim olmağa başladılar. Olarnıñ soñraki taqdiri belli degil. Ukrayina Mudafaa nazirligi, "Azovstal"deki arbiylerni deñişüv protsedurası ile evlerine qaytaracaq olğanlarını bildirdiler.
Amma Rusiye Devlet Dumasında "Azov" polkunıñ arbiyleriniñ Ukrayinağa berilmemesi ile bağlı teklifler oldı. Mayısnıñ 17-nde, Rusiye Baş prokuraturası Ukrayinanıñ "Azov" polkunıñ torrorcı teşkilât kibi tanılması ve memlekette faaliyetiniñ yasaq etilmesi içün Yuqarı mahkemege muracaat etkeni belli oldı.
Ukrayina prezidenti Volodımır Zelenskıy mayısnıñ 18-nde Mariupoldeki «Azovstal» zavodından tahliye tedbirleri devam ete, dep qayd etti.
Ukrayina Mudafaa naziriniñ muavini Ğanna Malâr mayısnıñ 17-nde gece Ukrayina arbiyleri «Azovstal» zavodından tahliye etip başlağanını tasdıqladı. Onıñ aytqanına köre, ağır yaralanğan 53 arbiy işğal etilgen Novoazovsk tibbiy müessiselerine tahliye etildi. Daa 211 insan gumanitar ayattan Yelenovkağa ketirildi.
Mayısnıñ 16-nda aqşam «Azov» polkunıñ komandanı Denis Prokopenko Mariupol imayecilerini ayatlarını qorumaq içün emirni yerine ketirdi, dep bildirdi. Angi emir aqqında aytılğanını añlatmadı. Tek Mariupol garnizonınıñ arbiyleri 82 kün devamında «duşmannıñ büyük küçlerini özüne çekti», dep ayttı. Ve «yüksek arbiy komandanlıqnıñ» «tasdıqlanğan qararını» yerine ketireler, dep qayd etti.
Prezident Volodımır Zelenskıy Ukrayina Mariupolniñ blokunı cenk yolunen toqtatamay, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.