Ukrayına Silâlı quvetleri Soledardan çekilgenini tasdıqladı – kütleviy haber vastaları

Ukrayına Mudafaa quvetleri Soledardan çekildi, dep bildirdi Şarqiy ordu vekili Serğiy Çerevatıy kütleviy haber vastalarına, hususan Ukrayına «Suspilne» ve BBC neşirlerine.

«Mudafaa quvetleriniñ askerlerini qorumaq içün Soledardan çekildik ve evelden azırlanğan mudafaa sıñırlarında pekitildik. Soledar imayecileri duşmanlarnıñ sayısı 3-5 qat çoq olsa da, da bir qaramanlıq yaptı, mevzilerini qorudı. Duşmannıñ askerlerini büyük sayıda öldürdi, eki çeçen cenkinde istilâcınıñ ğayıplarınen qıyaslana bilecek qadar», – dep bildire Çerevatıynıñ aytqanlarını BBC.

«Suspilne» bildirgeni kibi, Şarqiy gruppirovka vekili Soledar imayecileri yerine ketirgen esas vazifeni qayd etti: «duşmanğa cebeni keçmege ve arqasına kirmege imkân bermedi».

«Duşman kibi yapıp olamaymız, askerlerimizni ölümge atamaymız. Duşmannı quvetsizleştirmek içün manövr etmege, ateş açmağa, kiçik gruppalarnıñ taktiklerini qullanmağa tırışamız», – dep qayd etti Çerevatıy.

Çerevatıynıñ aytqanına köre, Soledarda cebe yolu tegiz oldı: kimse sarıp alınmadı, Ukrayına arbiyleri esir alınmadı.

Büyük Britaniya istihbaratı yanvarniñ 18-nde yanvarniñ 16-na qadar Ukrayına ordusı Donetsk vilâyetiniñ Soledar şeerinden «büyük ihtimalnen çıqqan» ve şeerni Rusiye arbiyleri ve yalçıları kontroli altında qaldırğandır, dep bildirdi.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.