Tiflisteki aktsiyada suvatqıç ve gaz qullanıldı – narazılıq bildirgenler «parlament qamaçavını» başlattı
Tiflisniñ merkezinde mitingde iştirak ettkenler Gürcistan parlamenti ögünde qoyulğan maden qoralarnı bozmağa tırışa. Seferber etilgen uquq qoruyıcılar narazılıq bildirgenlerge qarşı suvatqıç qullana, dep haber ete SOVA.
Gürcistan İç işler nazirligi bir beyanat aydınlatıp, narazılıq bildirgenlerni qanundan tış areket etmemesine çağırdı. Aks alda areketleri toqtatılacaq, dep bildirdi müessise.
«İç işler nazirliginiñ quvetleri Tifliste seferber etildi, Rustaveli caddesi, parlament binası yaqınlarında olar cemaat nizamını qoruy ve mitingniñ telükesiz bir şekilde keçirilüvini temin ete. İç işler nazirligi mitingniñ iştirakçileri, teşkilâtçıları ve siyasiy liderlerni söz serbestligi ve barışıq toplaşuv qanunınıñ normaları tışında areket etmemesine çağıra. Aktsiya vaqtında er angi qanun bozuluvı qanun çerçivesinde polis tarafından toqtatılacaq», – dep aytıla haberde.
Çetel tesir agentleri qanun leyhasına qarşı çıqqanlar Gürcistan akimiyetine eki talapnıñ yerine ketirilmesi içün bir saat berdi: qanunnı parlamentten acele keri almaq ve qanunsız tutulğanlarnı azat etmek.
Bir saat keçken soñ «parlament qamaçavına» başlamaq qararı alındı. Bundan ğayrı, aktsiya iştirakçileri yarınki parlament sessiyasınıñ keçirilüvine keder etmege planlaştıralar.
«Çetel agentleri» qanun leyhasınıñ qabul etilüvi parlament binası ögünde çatışmalarnıñ sebebi oldı. Polis narazılıq bildirgenlerge qarşı mahsus vastalar, hususan suvatqıç ve közyaşlatqan gaz qullandı. 60-tan çoq insan tutuldı. Uquq qoruyıcı ve aktsiya iştirakçileri arasında zarar körgenler bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.