"Kollaborantlar Türkiye devlet başınıñ nazar noqtasına tesir ete bilmez". Eskpertler qırımtatar meselesinde Erdoğannıñ nazar noqtası aqqında
AQMESCİT – Türkiye prezidenti Recep Tayyip Erdoğan devlet başı vazifesine tekrar saylanğan soñ işğalci Rusiye ile devam etken büyük cenkte Ukrayinanıñ suverenitet oğrunda küreşinde Türkiyeniñ sarsılmaz nazar noqtasını tasdıqladı. Aynı zamanda Türkiye devlet başı qırımtatar halqınıñ Ukrayinağa sadıq qalğanını qayd etti. Qırım.Aqiqat qırımtatar kollaborantları soñki doquz yıl içinde Türkiye reberliginiñ nazar noqtasına ne içün tesir etip olmağanına dair qırımlı ekspertlerniñ fikrini ögrenmek qararına keldi.
Erdoğan qırımtatar halqı Ukrayina tolpraq bütünligini faal şekilde qorçalağanını qayd etti.
Türkiye prezidenti Qırım Ukrayina toprağıdır demege isteyerek, "Ukrayinanıñ kelecegine emin olmamıznıñ diger sebebi qırımtatarlarnıñ öz memleketiniñ azatlığı oğrunda ğayretli küreşidir" dep ayttı.
Rusiyege qoltutqan faal Zaur Smirnov Erdoğannıñ bu sözlerinden soñ Türkiye prezidentini "qırımtatatrlarnıñ kerçek yaşayışı ile tanımaq içün" öz temsilcilerini Qırımğa yollamasına çağırdı.
"Türkiye prezidenti Zelenskıy ile körüşüvde kerçek ile iç bir alâqası olmağan qırımtatarlarnı kene Ukrayina ile aynılaştırdı. Sayğılı Erdoğan qırımtatarlarnıñ kerçek yaşayışı ile tanışmaq içün öz temsilcilerini Qırımğa yollamalı ve ondan soñ bu mevzuda bildirmeler yapmalı", - dep ayttı Smirnov.
Qırımtatar Milliy Meclis reisiniñ muavini İlmi Umerov Erdoğannıñ Qırımğa dair çoqtan qattı nazar noqtası bar, dep saya.
"Erdoğan qırımtatarlarnıñ meselesini pek yahşı bile. Qırımtatarlar ile bağlı qararlar alğanda o mesleatçılarınıñ tevsiyelerini pek siyrek qullana. Kimerde Rusiye ile ne içün işbirlik etkenini añlamaymız. Sanktsiyalarğa qoşulmay. Tecavuzcığa ayaqta qalmağa imkân bere ve aynı zamanda Qırımnıñ işğalini tanımağanını bildire. Ukrayinanıñ suvereniteti ve topraq bütünligini desteklegenini daima ayta. Bu sebepten de kollaborantlar Türkiye prezidentiniñ nazar noqtasına tesir ete bilemez. Meseleni bilgeni içün özü qarar bere. Erdoğan ekili oyunnı devam etkenini ve şimdilik bunı becerip olğanını da aytmaq kerek. O Rusige qarşı de pek sert sözler ayta, de bir şey olmağanı kibi işbirlikni devam ete. Areketlerini ise yalıñız Türkiyeniñ meraqları ile añlata", - dep ayttı Umerov.
Halqara uquq eksperti, professor Borıs Babin, Qırım.Aqiqatqa "qırımtatar kollaborantları esas hususiyetlerine köre Türkiye akimiyeti ve muhalifeti, umumen Türkiye cemiyeti ve hususan da Türkiyeniñ qırımtatar diasporası içün iç bir şey degil" dep ayttı.
"Birinciden, olar subyektiv degil ve işğal akimiyetiniñ yarımadadaki faaliyetine, daa ziyade Kremlge kerçekten tesir ete bilmezler. Bundan ğayrı, Türkiyede aqlı başında olğan er bir kişi içün böyle qırımtatarlarnıñ arqasındaki bütün "ihrac" personajları yalıñız "Moskvalılar" degil, Rusiye mahsus hızmet organlarınıñ agentleri, em de "ekinci dereceli" şahıslardır. Şunıñ içün bir taraftan böyle "ziyaretçilernen" temasta olmaq manasızdır. Çünki Moskvağa tesir etmek içün Ankaranıñ diger daa semereli ve vastasız kanalları bar. Ekincide, bu kibi kollaborantlarda açıq bir "haink" işareti bar. Olar işğalcilerniñ qırımtatarlarğa qarşı basqılarını aqlaylar, şu cümleden Türkiye ealisi içün "pek de sevimli olmağan" yavurlar tarafından musulmanlarğa qarşı basqılar da. Türkiyedeki qırımtatar diasporasınıñ özü ise, Rusiye ve Sovetler tarafından eki soyqırım ile bağlı küçlü bir tarihiy afızağa saiptir", - dep qayd etti ekspert.
"Qırım" batalyonınıñ komandiri İsa Akayev bu meselede Qırımtatar Milliy Meclisiniñ müim rolüni qayd etti.
"Erdoğan Ukrayinadaki vaziyetni añlay. O, em Rusiyeniñ tecavuzını, em de başta Qırımnı soñra da Ukrayinanıñ diger bir qısmını ilhaq etmek ıntıluvını pek yahşı añlıy. Şunıñ içün Erdoğan bu meselede Rusiyeni desteklemedi. Erdoğan küçlü bir siyasetçi, o em Ğarp ve Şarq arasında bir balan saqlap ola. Onı bir şeyge qandırmaq pek qıyındır, hususan da Qırımdaki kollabarantlarğa. Em de Milliy Meclis Türkiye reberligi ile çoqtan endi konstruktiv munasebetler qurdı. Erdoğannıñ Ukrayina topraq bütünligini desteklegeni de Meclisniñ işidir", - dep ayttı Akayev.
Qırımtatar faali Edem Dudakov kollaborantlar "Türkiye akimiyeti içün meraqlı degil" dep saya.
"İzaat pek sadedir. Yapamadılar, qabul etilmediler, davat etilmediler ve ilâhre. Çünki türkler ve olarnıñ prezidenti aqılsız degiller. Bu bular, Rusiye tarafında tayin etilgenler halq tarafından saylanğan olmağanlarını añlaylar. Demek Qırımnıñ tamır halqını da temsil etip olamaylar. Böyle marqurtlarnı kimse bir yerde sevmey. Türkler uydurma davalar, siyasiy mabüsler aqqında bileler. Ve bu tayin etilgenlerniñ şu davalarda iştiragi aqqında da bileler. Er şeyni talil eteler, hulâsalar çıqaralar. Şunıñ içün 9 yıl içinde ne medeniy deñişüv, ne alâqa, ne destek bar. Ne qadar ğayret etmeler de bile", - dep qayd etti faal.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.