Keriç civarında küçlü patlavlar: Keriç köprüne yañı ücümmi?

Avgustnıñ 12-nde Keriç köprü civarında küçlü patlav sesleri eşitildi. Rusiye akimiyeti Ava Mudafaası quvetleri ukrayina raketasını urış tüşürgeni aqqında bildirdi. Kıyiv bunı şimdilik daa izatlamadı. Keriç köprü üzerinde qoyu tüsses bulutları ve şaatlarnıñ sözlerine köre pencere camlarını titretken patlavlar Keriç sakinlerini ve Rusiye turistlerini qorqutqanlar. Bu vaqialar aqqında tafsilâtlıca Qırım.Aqiqat materialında.

Birinci ücüm

Saat 13:00-te Keriçte bir qaç patlav sesi eşitilgen. Bunı Qırım.Aqiqat mühbiri bildirdi. Haber etilgeni kibi, patlavdan sebep şeerniñ merkezindeki evlerde pencere camları titregen.

Patlav sesleri Keriçniñ diger rayonlarında da eşitilgen, şu cümleden şeerniñ tışında, Azaq ve Qara deñizleri yalısında.

Qırımnıñ işğal yolbaşçısı Sergey Aksönov Keriç köprüne ücüm etilgenini bildirdi. Onıñ sözlerine köre, Keriç boğazı civarında eki qanatlı raketa urıp tüşürilgen.

"Keriç boğazı civarında Ava mudaafası quvetleri tarafından eki duşman raketası urıp tüşürildi. Qırım köprü zarar körmedi", - dep yazıla bildirmede.

Yerli telegram kanalları Keriç köprü etrafında tüsses foto ve videolarını yayınladı. Aksönovnıñ mesleatçısı Oleg Krüçkovnıñ biraz soñra bildirgeni kibi, bu "mahsus hızmetlerniñ tüsses peredsidir".

RF Mudafaa nazirliginde Qırım (Keriç) köprüne C-200 zenit raketası ile darbe endirmege tırıştılar dep bildireler.

Nazirlikniñ malümatına köre, Ava Mudafaası quvetlerini onı körgen ve avada zarasızlaştırğan. Aynı zamanda, Qırımnıñ Rusiye yolbaşçısı Aksönov eki raketa urıp tüşürilgeni aqqında bildirdi.

Bundan evel ğayrıdan açılğanında yarım saat soñra Keriç köpründe areket kene toqtatıldı.

Ekinci ücüm

Tahminen saat 15:00-te Keriçte kene patlav sesleri eşitildi. Bu sefer Qırım.Aqiqat mühbiriniñ malümatına köre, biri-yuiri artından 6-ğa yaqın patlav olğan. 

Keriç sakinleri de içtimaiy ağlarda yañı patlavlar aqqında yazıp başladı.

İçtimaiy ağlarda qaza yerinden foto ve video yayınlamama çağıruvınen yazılar peyda olıp başladı. 

Vaqianı öz közüne körgenler ise farqlı taraflardan Ava mudafaası quvetleriniñ Keriçteki işini çektiler. 

Rusiye TİN resmiy temsilcisi Mariya Zaharova Keriç köprü ve Qırımğa ücümlerni uzaatlar eken "bütün bular cevapsız qalmaycaq" dep bildirdi.

"Bu bizim deñizimiz"

Ukrayina onıñ Keriçke köprüne ücüm etmesine dair qabaatlavlarnı izaatlamay.

Aynı zamanda Ukrayina Mudafaa nazirliginiñ Baş istihbarat idaresi Keriç köprüne ücüm etilgeni aqqında haber etilgende suv üstü dronnıñ işinen video yayınladı. 

Videoda farqlı tarihlar qayd etilgen - mayıs, iyün, avgust ve soñunda "Bu bizim deñizimiz" dep yazılğan. 

"Moskva basqıncılarını yerde, avada ve suvda yoq etmege devam etemiz! Şa olsun Ukrayinağa!", - dep bildirdiler Ukrayina istihbarat idaresinde.

İyülniñ 17-nde saba Qırımnıñ Rusiye yolbaşçısı Sergey Aksönov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.

Ukrayina Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayina Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o.

RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.

2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.