Казан мэриясе «Салават күпере» автомобиль юлы салу өчен ун кишәрлек алачак
(Казан, 28 ноябрь, «Татар-информ»). Казан мэриясе «Салават күпере» торак комплексына юл төзү өчен Киров районының Осиново урамы буенча 10 җир кишәрлеген һәм аларда урнашкан күчемсез милек объектын алачак. Әлеге исемлек башкарма комитетның документлар җыентыгында бастырып чыгарылган.
«Муниципаль ихтыяҗлар өчен җир кишәрлекләрен һәм аларда урнашкан күчемсез милек объектларын сатып алу юлы белән әлеге карарның кушымтасы нигезендә алырга», — диелә документта.
Алыначак җир кишәрлекләре исемлегенә Осиново урамы буенча ун объект: 2/78, 4, 6, 8, 10, 12, 13, 14, 14а һәм 15 кергән. Бу - хуҗалык корылмалары, торак йортлар һәм торак йортның бер өлеше.
Карар нигезендә, милекчеләр ун көн эчендә объектларны алу турында хәбәр алачак. Казан шәһәре Башкарма комитетының Торак сәясәте идарәсенә җир кишәрлекләренең һәм күчемсез милекнең базар бәясен бәяләргә туры киләчәк. Идарә шулай ук җирне милекчеләрдән алу турында килешүләр төзиячәк.