Фәрит Мөхәммәтшин халык дипломатиясенең югары потенциалы турында әйтте

(Казан, 28 ноябрь, «Татар-информ»). Халык дипломатиясе ракурсында Татарстан Халыклары ассамблеясе бик мөһим эш алып бара, ул югары бәяләнә. Шул турыда бүген Татарстан Дәүләт Советы Рәисе Фәрит Мөхәммәтшин Казанда узган семинарда белдерде. Бу хакта республика парламенты матбугат хезмәте хәбәр итә.

Семинарда Мәскәүдән килгән мәдәниятара һәм милләтара хезмәттәшлек үзәге идарәсе рәисе Ашот Айрапетян катнашты. Аның фикеренчә, «милләтара тынычлыкны һәм татулыкны ныгыту буенча Татарстан тәҗрибәсе иң югары дәрәҗәдә трансляцияләнүгә лаек».

Кунак шулай ук Ассамблеяның җәмәгать оешмасы буларак БМОның социаль-икътисади комиссиясе каршындагы консультация статусын алырга мөмкин, дип саный. Ул халыкара мәйданда республиканы гына түгел, бөтен илне тәкъдим итү өчен кирәк.

Фәрит Мөхәммәтшин Ашот Айрапетянга шундый тәкъдим ясаганы өчен рәхмәт белдерде. «Без үз тавышыбыз белән проблемаларны хәл итү юллары турында сөйләргә тиеш, безнең ассамблея – нәкъ менә ачык диалог алып барырга мөмкин булган ачык мәйданчык», – диде парламент башлыгы.

Ашот Айрапетян шулай ук киләсе елда БМО оешуының 75 еллыгын билгеләп үтәчәген искәртте. Ул БМОга иҗтимагый оешмалар, ягъни халык дипломатиясе зур ярдәм күрсәтә, диде. Үзәк идарәсе рәисе чарада катнашучыларга Татарстанда милли-мәдәни берләшмәләр катнашында тупланган әлеге дипломатия тәҗрибәсе белән уртаклашырга тәкъдим итте.

«Халык дипломатиясе һәм милли берләшмәләр» семинары Татарстан Республикасы Халыклар дуслыгы йортында узды. Анда Татарстанның милли-мәдәни берләшмәләре җитәкчеләре һәм вәкилләре чакырылган иде.