Язучылар берлегендә танылган язучылар яшь авторларның иҗатына бәя бирәчәк
(Казан, 28 ноябрь, «Татар-информ»). 29 ноябрьдә Татарстан Язучылар берлегендә Яшь язучыларның республика семинары үткәрелә. Семинарда танылган язучылар яшь авторларның иҗатына бәя бирәчәк. Бу хакта оештыручылар хәбәр итә.
Семинар сәгать 10.00 дә Тукай клубында пленар утырыш белән башланачак.
Утырыштан соң танылган язучылар үзләренең остаханәләрендә семинарда катнашучы 30дан артык яшь авторның иҗатына бәя бирәчәк. Семинар "Татар әдәбиятының киләчәге кемнәр кулында?" дип исемләнгән түгәрәк өстәл артында фикер алышу белән тәмамланачак.