Балтачта беренче тапкыр тавыш бирүдә катнашучыларга бүләк әзерләгәннәр

(Балтач, 1 декабрь, «Татар-информ», «Хезмәт», Зөлфия Шакирова). Балтач районының Норма авыл җирлегендә урнашкан Норма, Кили мәдәният йортларында һәм Норма урта мәктәбендә урнашкан тавыш бирү участоклары иртәнге сәгать 7дән үк ачылды. Беренче тапкыр тавыш бирүгә килүче яшьләр өчен «Минем тәүге тавыш бирүем» дигән магнит та эшләткәннәр. Бу турыда район басмасы хәбәр итә.

Норма авыл җирлегендә үзара салым акчасына хәйран күп эшләр башкарыла. Җирлектә яшәүчеләр моны аңлый, күрә. Киләсе елда да җирлектә бик күп эшләр планлаштырыла: юллар ремонтлау, зират коймаларын алыштыру, күпер эшләү, чишмәләрне рәтләү, уен мәйданчыгын тулыландыруга, җәяүле сукмаклары салуга тотылачак.

Көн үзәгенә таба тавыш бирүчеләр күпләп килә башлады. Музыка яңгырап тора, мәдәният йорты каршында " Икмәк» җәмгыяте сату итә. Сәгать 10 тирәсендә 200гә якын кеше тавыш бирергә өлгерде. Сабыйлары белән килүчеләр дә күп. Авылларыбызны матурлау, төзекләндерү киләчәк буыннар өчен дә үрнәк булып тора.

Тавыш бирергә килүчеләр барысы да изге теләктә, күңелләре шат. Җирлектә яшәүче Тәлгать абый Садыйковның туган көне икән бүген, 70 яшь ди. Исәнлек- саулык, хәерле озын гомерләр телик мөхтәрәм тавыш бирүчебезгә. Әнә шулай бик күркәм бара җирлектә тавыш бирүләр. Тавыш бирергә килалмаучылар комиссия вәкилләрен өйләрендә көтә.