Ульяновскида татар телен hәм мәдәниятен үстерү юнәлешендә зур эшләр башкарыла

(Казан, 28 декабрь, «Татар-информ»). Шушы көннәрдә Яңа шәhәрнең «Руслан» мәдәният йортында Татар теле hәм мәдәнияте көне үтте. Район администрациясе hәм татар милли-мәдәни автономиясенең җирле бүлекчәсе тырышлыгы белән оештырылган милли бәйрәмгә халык тамаша залын шыгрым тутырып килде. Бу хакта «Өмет» газетасы сайтында хәбәр ителә.

Милләттәшләребезне беренче булып район хакимияте башлыгы Наил Юмакулов сәламләде. Ул Ульяновск өлкәсе губернаторы Сергей Морозов тарафыннан игълан ителгән Милли бердәмлек елында район күләмендә бик күп чаралар үткәрелүе турында сөйләде.

Безнең Заволжье районының горурлыгы булган 64 нче мәктәптә рус, татар, чуваш, мордва телләрен hәм берничә чит телне өйрәнү мөмкинлеге тудырылган, анда шулай ук милли музейлар да эшләп килә, диде район җитәкчесе. Наил Юмакулов милли hәм дини эшләрдә активлык күрсәтүчеләргә администрациянең Рәхмәт хатларын тапшырды.

Шәhәр Думасы депутаты, «Боевое братство» оешмасы җитәкчесе Николай Лазарев Әфган сугышының утлы юллары аша узган батыр, курку белмәс татар ир-егетләренә рәхмәт сүзләрен ирештереп, Зөфәр Хайретдинов, Илшат Сибаев, Вячеслав Хайбуллов hәм Әзгать Хайсаровны юбилей медальләре белән бүләкләде.

Өлкә татар милли-мәдәни автономиясе җитәкчелегенең кайнар cәламен «Өмет» газетасының баш редакторы Исхак Хәлимов җиткерде.

«Заволжье районы татар автономиясе hәм «1 нче мәхәллә» мөселман оешмасы, җирле хакимият органнары, татар эшмәкәрләре hәм иманлы, зыялы шәхесләр ярдәменә таянып, халкыбызның бердәмлеген ныгыту, милли үзаңын үстерү буенча күпләргә үрнәк булырлык эшләр башкара», — диде ул.