Казан электрон хезмәтләр буенча ел саен 140 миллион сум экономияләргә ниятли
(Казан, 13 гыйнвар, «Татар-информ», Ксение Перепеченова). ТР башкаласы бюджетында елына 140 миллион сум чамасы акчаны экономияләргә муниципаль хезмәтләрне электрон рәвешкә күчерү ярдәм итәчәк. Шәһәр халкы үз мөрәҗәгатьләренең яртысын диярлек интернет аша җибәрә башлагач, экономия барлыкка киләчәк, дип хәбәр итте Казан мэриясенең эшлекле дүшәмбесендә шәһәр башкарма комитетының Мәгълүмати технологияләр һәм элемтә идарәсе башлыгы Рифат Ханнанов.
«47 муниципаль хезмәт өчен мөрәҗәгатьләрнең яртысы гына булса да цифрлы рәвештә булганда, елга икътисади файда 140 млн сум тәшкил итәчәк», — диде Ханнанов.
Исегезгә төшерәбез, бу ел башыннан бирле uslugi.kzn.ru муниципаль порталында 47 хезмәт күрсәтелә. Элек булган 19 хезмәткә 28 яңа сервис өстәделәр.