2020 елда Татарстанда социаль ярдәмгә чыгымнар өчтән бергә диярлек арткан

(Казан, 8 июнь, «Татар-информ», Наталья Рыбакова). 2020 елда социаль ярдәмгә чыгымнар республикага өчтән бергә диярлек — 22,6 млрд сумга кадәр арткан. Беренче чиратта Covid-19 пандемиясенә бәйле рәвештә, бигрәк тә балалы гаиләләргә ярдәм күрсәтелде. Бу хакта бүген Татарстан хезмәт, халыкны эш белән тәэмин итү һәм социаль яклау министры Эльмира Зарипова хәбәр итте.

Татарстанлылар социаль челтәрләрдә Татарстанның рәсми бергәлекләрендә онлайн-трансляциядә сораулар бирде.

«Бу ата-аналары сәүдә, кунакханә яки ресторан бизнесында эшли торган гаиләләр. Алар элек беркайчан да социаль яклау оешмасына мөрәҗәгать итмәгән, үз мәсьәләләрен үзләре хәл иткән. Әмма пандемия белән бәйле рәвештә, алар эшсез калды, һәм хәзер дәүләт аларга ярдәм итте», — диде ул.

Татарстанда барлыгы 1,5 млн кешегә социаль ярдәм күрсәтелә. Ярдәмгә мохтаҗларның керемнәрен исәпкә алып, 60 кеше адреслы ярдәм ала. Эльмира Зарипова мәгълүматлары буенча, 2020 елга төбәкнең социаль ярдәменә бюджетта 22,6 млрд сум каралган, бу узган ел белән чагыштырганда 8 млрд сумга күбрәк. Бу акчаларның күпчелек өлеше бер тапкыр түләнә торган чыгымнар тәшкил итә. Быел кешеләргә социаль ярдәм күрсәтүгә Татарстан бюджетыннан 12,7 млрд сум һәм федераль бюджеттан 9,9 млрд сум бүлеп бирелгән.