Айдар Метшин 11нче микрорайонда төзекләндерү эшләре буенча күчмә киңәшмә үткәрде
(Казан, 31 июль, «Татар-информ»). Түбән Камада «11нче микрорайон» трамвай тукталышы павильоны һәм аның әйләнә-тирәсендә төзекләндерү эшләре башлана. Айдар Метшин микрорайонда төрле структура җитәкчеләре катнашында күчмә киңәшмә үткәрде. Бу турыда Түбән Кама муниципаль районы рәсми сайтында хәбәр ителә.
Эш барышында әлеге тукталыш урынының, чыннан да, халык өчен куркыныч булуы, кичекмәс чаралар кылырга кирәклеге билгеләнде. Тукталыш урыны янәшәдәге 22нче мәктәпкә йөрүче балалар өчен дә куркыныч. Якын арада биредә ремонт эшенә керешәчәкләр.
«Боларның барысын да яңа уку елы башланганчы эшләргә кирәк», — диде Айдар Метшин. Мэр тукталыштан мәктәпкә кадәр барлык җәяүлеләр маршрутын карап чыкты.
Шәһәр җитәкчеләре белән очрашуда 22нче мәктәп бинасы турында да сүз барды. Мәктәп периметры буенча барлык керү урыннары реконструкция таләп итә. Объектның үзәк ишек төбе дә ремонтланачак. Моннан тыш, мәктәп территориясендә урнашкан футбол кыры да яңартылачак.