(Казан, 17 август, «Татар-информ»). Казанда Татарстан Президентына кандидатларның берсе Альмир Михеевның агитация кампаниясе башланды. Бу хакта «Татар-информ»га «Гадел Россия» партиясенең матбугат хезмәтендә сөйләделәр. «Шәһәр халкын Альмир Михеевның сайлау алды программасы кызыксындыра. Күп кенә казанлылар агитация кублары янында туктый һәм альмир2020.рф программасы белән сайтка алып баручы QR-кодны сканерлый» ,-диделәр матбугат хезмәтендә. Моннан тыш, республика халкының почта тартмаларына партия газетасын тарату дәвам итә. Соңгы ике атна эчендә басманың яңа чыгарылышын 17 мең татарстанлы күрде. «15 августтан башлап Татарстан халкы Татарстан Республикасы Президенты вазифасына кандидат Альмир Михеевның листовкаларын да почта аша ала. Листовкаларның беренче дулкынының гомуми тиражы - 500 мең данә. Кампания ахырына кадәр тагын ике яки өч тираж листовкалар бастырылачак, Татарстан Республикасы һәр сайлаучысының Альмир Михеев программасы турында белү мөмкинлеге булсын өчен кирәк бу», – дип өстәделәр матбугат хезмәтендә. Альмир Михеевтан тыш, Татарстан Президенты постына республиканың хәзерге җитәкчесе Рөстәм Миңнеханов («Бердәм Россия»), Олег Коробченко («Үсеш партиясе»), Альфред Вәлиев («Россия коммунистлары») һәм Владимир Сурчилов (ЛДПР) дәгъва итә.