Актанышта бер җәмгыять республика күләмендә беренче булып урып-җыюны төгәлләгән
(Казан, 25 август, «Татар-информ»). 25 август көнне, 11 сәгать 45 минутта Актаныш районының Нур Баян исемендәге җәмгыяте республика күләмендә беренчеләрдән булып, 2020 елның урып-җыю кампаниясен төгәлләүгә иреште. Бу турыда Актаныш муниципаль районы матбугат хезмәте хәбәр итә.
Хуҗалыкның 2010 гектардан алынган тулаем уңыш 88 646 центнер тәшкил итә. Бер гектардан уртача 44,1 центнер уңыш алынган.
2020 елның тәүге урак батырларын беренчеләрдән булып Актаныш район башлыгы Энгель Фәттахов тәбрик итте. Район башлыгы «Нур Баян» хуҗалыгы җитәкчесе Айрат Гапсәләмовка, аның коллективына ихлас рәхмәт сүзләрен җиткерде.