Мөдәррис Вәлиев иртәгә соңгы юлга озатыла
(Казан, 27 август, “Татар-информ”, Рузилә Мөхәммәтова). Әдәбият тәнкыйтьчесе, шагыйрь, язучы һәм нашир Мөдәррис Вәлиев соңгы юлга иртәгә озатылачак. Бу хакта язучының хатыны Даимә Вәлиева әйтте. “Татарстан Язучылар берлеге белән дә киңәшләштек. Мөдәррисне иртәгә өебез яныннан озатабыз. Казанда җирлибез, аның әнисе дә, абыйсы Шамил Маннапов та Казанда күмелгән. Шулар янындарак булыр инде”, - диде Даимә Вәлиева. Мөдәррис Вәлиев Казанның Ямашев урамындагы 51нче йорт яныннан озатылачак. Вакыты сәгать 11.00 дип билгеләнгән. Мөдәррис Вәлиевның якыннары Казанның Киндери зиратына җирләнгән. Ул алар янына җирләнер дип уйланыла. Мөдәррис Вәлиев озакка сузылган авырудан соң 67 яшендә вафат булды .