(Казан, 13 гыйнвар, «Татар-информ», Рифат Каюмов). Казанның кайбер автобусларында «Пассажирларга сулыш органнары җәмәгать транспортына керү тыела» дип 2020 елның азагында яңгыраган фразаны төзәткәннәр. Бу хакта «Татар-информ» хәбәрчесенә Казанның 2нче пассажир автотранспорт предприятиесе директоры урынбасары Артур Абдулхаков әйтте. Дикторның «Пассажирларга сулыш органнарын саклаучы чаралардан башка җәмәгать транспортына керү тыела» фразасын русчадан татарчага тәрҗемә иткәндә берничә сүзнең төшеп калуы фикернең мәгънәсен көлкегә әверелдерә. Мәгънәсез тәрҗемә социаль челтәрләрдә тәнкыйть уята. Кулланучылар көлке сүзләрне Казанның 4нче, 22нче һәм 31нче маршрут автобусларында яңгыравын искәртә. Әлеге хәлгә аңлатма алу максатыннан «Татар-информ» мәгълүмат агентлыгы автотранспорт предприятиесенә мөрәҗәгать итте. «Тәрҗемәдә киткән ялгышлык турында декабрь азагында мэриягә хәбәр иткәннәр. Бу турыда мәгълүмат килеп ирешүгә, без тикшерү уздырдык һәм хатаны төзәттек. Тикшерү хаталы тәрҗемәнең 4нче һәм 22нче маршрутларда булганын ачыклады. Гыйнвар бәйрәмнәрендә хаталы язма дөресләп үзгәртелде», — диде Артур Абдулхаков.
