(Казан, 13 гыйнвар, «Татар-информ», Надежда Гордеева). Дәүләт Думасы Россия Конституциясенә кабул ителгән төзәтмәләрне гамәлгә ашыру буенча 21 закон кабул итте. Бу хакта матбугат конференциясендә Дәүләт Думасы депутаты Илдар Гыйльметдинов хәбәр итте. «Бик күп документ эшләнә әле. Илледән артык закон проектын кабул итәргә кирәк», — дип сөйләде депутат. Гыйльметдинов сүзләренчә, узган ел Дәүләт Думасы берничә җитди закон кабул итте, алар ниндидер юнәлешләрне, тармакларны үзгәртә. «Бюджет дефицит белән, әмма төп параметрларны һәм дәүләтнең социаль йөкләмәләрен без сәламәтлек саклау системасына, гражданнарга, күп балалы гаиләләргә ярдәм итүне исәпкә алып саклап калдык. Бюджет 37 процентка социаль мәсьәләләрне хәл итүгә юнәлтелгән», — диде спикер. РФ Конституциясенә төзәтмәләр буенча гомумроссия тавыш бирү узган елның 25 июненнән 1 июленә кадәр узды. Татарстанда тавыш бирү өчен 65 территориаль һәм 2809 участок сайлау комиссиясе җәлеп ителде.