Яңа Чишмә районында яшәүчеләрне коронавирустан вакцинация ясатырга чакыралар
(Казан, 15 гыйнвар, «Татар-информ»). Татарстанның Яңа Чишмә районында коронавирустан вакцинация актив бара. Үзәк район хастаханәсенең баш табиб вазифаларын башкаручы Наталья Роменская сөйләвенчә, прививка ясатырга теләүчеләр Үзәк район хастаханәсенә мөрәҗәгать итә ала. Бу турыда «Шешминская новь» газетасы хәбәр итә.
Табиблар сүзләренчә, вакцинация коронавирустан саклану өчен иң ышанычлы ысулларның берсе. Республикада коллектив иммунитет булдыру өчен халыкның 60-70 процентына прививка ясарга кирәк. Хәзер Татарстанда яшәүчеләргә «Спутник V» вакцинасын ясыйлар.
Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтнең баш белгече Гөлфирә Мостафина сүзләренчә, пандемия башланганнан алып Яңа Чишмә районында 46 кеше коронавирус йоктырган. 39 кеше терелгән, ике кеше үлгән.
Хәзерге вакытта биш кеше ковид белән авырый, алар белән элемтәдә булган 13 кеше изоляциядә.