КАМАЗ электробуслар эшләп чыгару планын ике тапкыр арттырган
(Чаллы, 25 гыйнвар, «Татар-информ»). Узган елда «НЕФАЗ» 202 электробус эшләп чыгарган, 2021 елда инновацион транспорт җитештерүне ике тапкыр арттыру күздә тотыла.
«КАМАЗ» акционерлык җәмгыятенең матбугат хезмәте хәбәр иткәнчә, бүген Мәскәү линияләрендә 400 «КАМАЗ» электробусы йөри, шуның яртысы 2020 ел дәвамында сатып алынган.
«Мин пассажир транспортына һәрвакытта да „КАМАЗ“ өчен ярдәмче юнәлеш буларак карадым. Шулай да без Россия базарында технологик лидерга әверелгән техника булдыра алдык. Мәскәү базарына чыгу бизнесның масштабларын үзгәртте», - диде КАМАЗның генераль директоры Сергей Когогин.
Бүген КАМАЗда инновацион транспортны үстерүне күздә тоткан программа гамәлгә ашырыла. Әлеге юнәлеш кысаларында 9 метрлы электробус проектлаштырылган, 18 метрлысы җыелган һәм сынаулар уза.