Түбән Камада Яшьләр үзәге булдыру өчен Чаллы тәҗрибәсен өйрәнәләр
(Казан, 5 февраль, «Татар-информ»). Айдар Метшин җитәкчелегендәге Түбән Кама делегациясе Чаллының төзекләндерелгән «Нур» яшьләр үзәгендә булып кайтты.
Эшлекле сәфәрдә район башкарма комитеты җитәкчесе Айдар Сәйфетдинов, район башкарма комитеты җитәкчесенең беренче урынбасары Радмир Беляев, Түбән Каманың баш архитекторы Эмиль Сираҗетдинов, яшьләр эшләре идарәсе җитәкчесе Айгөл Аитовалар да катнашты. Бу хакта инстаграмда мәдәни учреждение төркеменә сылтама белән Түбән Кама муниципаль районы рәсми сайты нда хәбәр ителә.
Түбәнкамалыларны «Нур» үзәге эшчәнлеге белән Чаллы башкарма комитетының яшьләр эшләре идарәсе җитәкчесе Айзат Мәхмүтов һәм үзәк директоры Полина Трянина таныштырган. Кунаклар «Ключ» театрын һәм «Метро» мәдәни-белем бирү платформасын да караган.
«Айдар Метшин һәрнәрсә белән бөтен ваклыкларына кадәр кызыксынды. Һәр детальгә игътибар итте, технологик процесс белән танышты, бизәлеш материалларын бәяләде. Шулай ук аңа икенче катта яшьләр берләшмәләре җитәкчеләренең бер зур кабинетта урнашып, бергә эшләве, берләшүе, яңа проектлар төзүе бик ошады. Алар үзләрендә дә шулай эшләргә телиләр», — дип яза үзәк директоры.