(Казан, 5 февраль, «Татар-информ», Розалия Хәйруллина). Казанның Иске Татар бистәсендә урнашкан «Татстрой» бинасы сүтелергә мөмкин. ТР Президентының матбугат хезмәте җитәкчесе Лилия Галимова журналистлар катнашындагы брифингта белдергәнчә, бу – республика Президенты идеясе түгел, ә шушы территориядә төзелеш эшләре алып барырга җыенган инвесторларның тәкъдиме. «Бинаны сүтү-сүтмәүгә бәйле идея ТР Президентыныкы түгел. Әлеге территориядә төзелеш эшләре алып барырга, бу зонаны үзгәртергә җыенган инвесторлар шундый тәкъдим белән чыкты. Президент аларның идеясен хуплады гына», - диде Галимова. «Татстрой» бинасын (Әхтәмов урамы, 1) аукционда Мәскәү инвесторы сатып алды. Хәзер аның алдагы язмышы хакында актив фикер алышулар бара. Бинаны сүтү һәм Иске Татар бистәсе территориясен башка максатларда файдалану фикер алышуда яңгыраган тәкъдимнәрнең берсе булды.
