Татарстанда узган тәүлектә тагын 33 кеше коронавирус инфекциясе йоктырган
(Казан, 8 апрель, «Татар-информ»). Татарстанда соңгы тәүлектә Covid-19 коронавирус инфекциясе йоктыруның 33 яңа очрагы ачыкланган.
ТР Сәламәтлек саклау министрлыгының матбугат хезмәтеннән хәбәр итүләренчә, аларның бөтенесе дә чирне башка авырулар белән аралашу нәтиҗәсендә эләктергән.
«16 кеше хастаханәгә озатылган, 17 кеше өендә дәвалана», - диелә ведомство хәбәрендә.
Чаллыда – 11, Казанда – 10, Азнакай, Актаныш, Баулы, Яшел Үзән районнарында – икешәр, Бөгелмә, Нурлат, Спас һәм Тукай районнарында берәр очрак ачыкланган.
Пандемия башланганнан алып республикада коронавирус инфекциясенең 19 698 очрагы теркәлгән, 16 786 кеше (шуларның 73е – узган тәүлектә) терелгән.
Республикада барлыгы 162 884 кеше (шуларның 5 703е – узган тәүлектә) коронавируска каршы прививка ясаткан. 102 260 кеше икенче дозаны да алган.