(Казан, 31 май, «Татар-информ»). Персоналга вакцинацияләү турындагы документларны ялганлап ясаган очракта кафе һәм ресторан хуҗаларына карата җинаять эшләре кузгатылырга мөмкин. Бу хакта эшлекле дүшәмбедә Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) Чаллы территориаль бүлеге башлыгы Илгизәр Бариев хәбәр итте. Автошәһәрнең баш санитар табибы хәбәр иткәнчә, яңа этап башлану белән, ковидка каршы режимның йомшаруы сәбәпле, Роспотребнадзор хезмәткәрләре, бизнес-секторларның яңа шартларда эшләргә әзерлегенә инану өчен, тикшерүләр сериясен башлап җибәрә. «Россия рестораторларының кайчагында тикшерүчеләргә вакцинацияләү турында тиешле булмаган документлар тапшырулары ачыкланган. Шунда ук кисәтәсем килә: мондый фокуслар узмаячак. Гражданнарны вакцинацияләү турында барлык мәгълүматлар федераль реестрга кертелә. Һәм теге яки бу кешенең прививканы ясатуын тикшерү бернинди кыенлык тудырмый. Ә идарәчеләр өчен мәгълүматларны фальсификацияләү нәтиҗәләре күңелсезрәк булырга мөмкин: аларга хәтта җинаять эше кузгатылырга да мөмкин», — диде Бариев. Элегрәк «Татар-информ» мәгълүмат агентлыгы хәбәр иткәнчә, Татарстанда барлык хезмәткәрләр дә Covid-19дан прививка ясаткан очракта, төн уртасыннан иртәнге алтыга кадәр җәмәгать туклануы йортларына эшләргә рөхсәт ителәчәк. Вакцинациягә каршы медицина күрсәтмәләре булган (медицина бәяләмәсе булган очракта) гражданнар искәрмә булып тора.
