Ветеринария хезмәткәрләренә куркыныч чирләр ачыкланганда эш тәртибен искәрттеләр
(Югары Ослан, 1 июнь, «Татар-информ», Гөлнар Гарифуллина). Бүген Югары Ослан районы Килди авылында республиканың ветеринария хезмәткәрләре өчен йогышлы авыруларны бетерү буенча өйрәнүләр узды. Чарага Татарстанның барлык районнарыннан ветеринария берләшмәләре җитәкчеләре, лаборатория хезмәткәрләре чакырылган иде.
Иң элек ТР Министрлар Кабинеты каршындагы Баш ветеринария идарәсе башлыгы Алмаз Хисаметдинов Премьер-министр урынбасары-авыл хуҗалыгы һәм азык-төлек министры Марат Җәббаровка ветеринария хезмәтендә кулланыла торган яңа технологик мөмкинлекләрне, җайланмаларны, машиналарны күрсәтте.
«2020 ел һәм 2021 ел башы республика өчен бик үк тыныч булмады. Кош гриппы һәм кыргый кабаннар арасында Африка дуңгыз чумасы теркәлде. Вакытында чарасын күргәч, бу чирләр таралыш алмады. Хуҗалык җитәкчеләре һәм шәхси ярдәмче хуҗалыклар инфекция таралу куркынычы турында вакытында кисәтелде», — диде Марат Җәббаров.
Алмаз Хисаметдинов Россиядә аеруча куркыныч йогышлы авырулар буенча вазгыять киеренке булуын әйтте. «Без теләсә нинди хәл килеп чыгуга әзер булырга тиеш, уяулык кирәк. Гел алдан чарасын күреп торсак та, йогышлы чир килеп чыгу ихтималы барыбер саклана», — дип кисәтте идарә башлыгы.
Бүгенге өйрәнүләр, янәсе, 31 май 21.00 сәгатьтә Югары Ослан районы ветеринария берләшмәсенә Килди авылында Сергей Пашков КФХсында дуңгызлар күпләп үлүе турында хәбәр килеп ирешү белән бәйле иде.
Авыруларны бетерүдә эшли торган группалардан катнаш отряд төзелде. Лаборатор диагностика, хайваннарны тоту һәм йоклату, исәпкә алу һәм хуҗалыктан алып китү, дезинфекцияләү, эпидемиологик разведка, эпидемиологик мониторинг, кыргый хайваннарның санын исәптә тоту, матди тәэмин ителеш, җәмәгать тәртибен саклау, янгын сүндерү төркемнәре эшли.
Урынга килгән хезмәткәрләр диагноз кую өчен терлектән биологик материал алды. Пробалар ашыгыч рәвештә Республика ветеринария лабораториясенә җибәрелде. Хуҗалык җитәкчесен, чит-ят кешеләрне һәм хайваннарны кертү тыела, дип кисәттеләр. Лаборатория Африка дуңгыз чумасы дигән диагноз куйды.
Бу территориядә чикләү чаралары белән карантин кертелде, һәм чир таралу куркынычы янаган чикләр билгеләнде.
Өйрәнүләр барышында, мал табибларына, шулай ук кош гриппына шик туганда, тавыкның авызыннан, себер түләмәсе, тилчәгә шик туганда, бозаудан биологик материалларны анализга алу тәртибе искәртелде.