(Казан, 1 июнь, «Татар-информ», Гүзәл Хөсәенова). Татарстан Дәүләт автоинспекциясендә электр самокатлары өчен электрон маршрут картасы булдырырга тәкъдим иттеләр. Республиканың баш Дәүләт инспекторы Ленар Габдрахманов Казан мэриясендә ТР Сәламәтлек саклау министрлыгы, прокуратура, шулай ук электр самокатларын прокатка бирү сервисы хезмәткәрләре катнашында узган түгәрәк өстәлдә шундый инициатива белән чыкты. Картада шулай ук электр самокаты белән идарә итүче «тимер атыннан» төшәргә тиешле җәяүлеләр юлы һәм юл участоклары да билгеләнәчәк. «Җәяүле сәгатенә 5 километр тизлек белән бара, самокат исә кайбер зоналарда биш тапкырга зуррак тизлек белән хәрәкәт итә. Машина йөртүче юлда тиешле реакция ясарга өлгерми. Самокаттан файдаланучы формаль рәвештә хаклы булачак — чөнки ул җәяүле, ә машина йөртүчегә нишләргә? Әлеге проблеманы акрынлап хәл итәбез», — диде Габдрахманов. Түгәрәк өстәл барышында чираттагы тапкыр самокатларны теләсә кайда калдырып китүгә бәйле мәсьәлә дә күтәрелде. Хәзерге вакытта Казанның архитектура һәм шәһәр төзелеше идарәсе тиешле компанияләр сораган 500 парковка урынын килештергән.
