Азов ислам фәннәре мәдрәсәсен тәмамлаучыларга диплом тапшырылды
(Казан, 17 июнь, «Татар-информ»). Имам Матуриди исемендәге Азов ислам фәннәре мәдрәсәсенең ирләр бүлегендә дини уку йортын тәмамлаучыларга дипломнар тапшыру тантанасы узды. Укучыларны тәбрикләргә аларның әти-әниләре, мәдрәсә укытучылары, студентларның туганнары, якыннары һәм дуслары килде. Кырым һәм Севастополь шәһәре мөфтие хаҗи Эмирали Аблаев дүрт егеткә дини белем алу турында диплом тапшырды. Бу турыда Россия мөселманнары Диния җыены матбугат хезмәте хәбәр итә. Ул чыгарылыш укучыларына халык алдында җаваплылык турында онытмауларын, хәзер аларга зур өметләр баглануын әйтте. «Имамга мәгърифәтле булырга кирәк, белем алыгыз, көчле һәм нык булыгыз. Белемегезне арттырыгыз һәм ватандашларыгызның тормышына битараф калмагыз», — дип теләде мөфти. Шулай ук Кырым мөфтие урынбасары Айдер Исмаилов та чыгыш ясады. «Мәдрәсә биредә укыган һәр кеше өчен туган йорт булып кала һәм биредә барлык сорауларга җавап табарга мөмкин», — диде ул.