Түбән Кама шәһәрен әйләнеп узу юлының икенче этабында сигез күпер төзергә җыеналар
Түбән Кама һәм Яр Чаллы шәһәрләрен әйләнеп узу юлының икенче этабында сигез күпер һәм ике юлүткәргеч төзү планлаштырылган. Моннан тыш, бер транспорт чишелеше төзергә кирәк булачак . Ул Чаллы – Әлмәт юлы кисешкән урында булачак.
Урап узу юлының озынлыгы 24 километр тәшкил итәчәк. Эшчеләр Келәтле елгасы аша күпер төзүгә керештеләр инде, дип хәбәр иттеләр Росавтодорда. Ә тагын җиде күпер Алан, Келәтле, Аулаш, Аштылга, шулай ук инешләр аша барлыкка киләчәк. Терәкләрне урнаштыруга әзерлек башланган. Бу турыда Түбән Кама муниципаль районы рәсми сайтында хәбәр ителә.
Юлүткәргечне 2022 елның июленнән төзи башларга җыеналар. Шул вакытта Тимерсу аша күпергә дә тотынырга уйлыйлар.
Исегезгә төшерәбез, әлеге чара М12 Казан – Екатеринбург глобаль проекты кысаларында төзелә.