Марат Кабаев: Санкцияләрдән, барыннан да элек, халык җәфа чигә
«Халык яшәсен, алга китеш булсын өчен, яңа продуктив юллар эзләргә кирәк», - диде Ислам Бизнесы Халыкара Ассоциациясе президенты.
Ислам Бизнесы Халыкара Ассоциациясе президенты Марат Кабаев Көнбатыш илләре Россиягә карата керткән cанкцияләрнең, беренче чиратта, халыкка йогынтысы булуын әйтте.
«Көнбатыш белән килешү юлларын эзләргә кирәк. Сәясәт – сәясәт инде, ләкин, барыннан да элек, бу санкцияләрдән халык җәфа чигә. Көнбатыш килешүне теләми икән, мин аларга хәерле юл телим», - диде ул «Татар-информ» хәбәрчесенә «Kazansummit 2022» XIII халыкара икътисади саммитыннан соң.
Аның фикеренчә, халык яшәсен, алга китеш булсын өчен, яңа продуктив юллар эзләргә кирәк. «Минемчә, һәр кешенең үз бизнесы, бизнеста үз юнәлеше булыр. Алар [cанкцияләр], киресенчә, барыбызга да уңай гына», - диде Марат Кабаев.
«Аңлашыла, Европа, Америка белән банк системасында проблема бар. Төрле хәлләр булырга мөмкин, барысына да әзер булып торыйк», - ди Ислам Бизнесы Халыкара Ассоциациясе президенты.