Кардиолог: Ковидтан соң йөрәк-кан тамырлары авырулары бер ел узгач та барлыкка килә
Ковид белән авырган кешедә, хәтта бер елдан соң да йөрәк-кан тамырлары системасының яңа патологияләре барлыкка килергә мөмкин.
«Өзлегүләр нәкъ менә йогышлы процесс яки госпитализация вакытында барлыкка килә дип фаразлау ялгышлык. Кызганычка, патология ковидтан соңгы чорда да барлыкка килергә мөмкин», – дип сөйләде «Татар-информ»да матбугат конференциясендә Татарстанның баш кардиологы Зөлфия Ким.
Аның сүзләренчә, йөрәк-кан тамырларында яңа авыруларның 5-10 проценты авырганнан соң 3-6 ай эчендә барлыкка килә.
«Ковидтан соң өзлегүләрнең иң күп таралганы - яңа артериаль гипертония. Бу очракта нәрсә эшләргә кирәк? Үз-үзеңне дәвалау белән шөгыльләнергә, бу узар дип өметләнергә ярамый. Теләсә кайсы очракта табибка мөрәҗәгать итәргә кирәк», - диде Зөлфия Ким.