Песошин: Икътисадта казанышлар ришвәтчелеккә каршы кискен көрәштән башка мөмкин түгел

Ришвәтчелек теләсә кайсы җәмгыятьнең тотрыклы социаль-икътисади үсешенә комачаулый. Ул һәр ил өчен стратегик милли приоритетларны тормышка ашыруда куркыныч тудыра. Бу хакта Татарстан Премьер-министры Алексей Песошин Халыкара коррупциягә каршы көрәш көне уңаеннан мөрәҗәгатендә искәртте.

«Татарстан Республикасында ел саен коррупциягә каршы мониторинг үткәрелә, аның нәтиҗәләре дәүләт хакимиятенең башкарма органнарына һәм җирле үзидарә органнарына эшчәнлекләрен алга таба камилләштерү өчен җибәрелә.

Гавәми хакимият органнары эшчәнлегенең ачык булуын тәэмин итү максатларында Татарстан Республикасы министрлыкларының, ведомстволарының, җирле үзидарә органнарының рәсми сайтларында хезмәткәрләрнең керемнәре һәм чыгымнары турында мәгълүмат урнаштырыла. Моннан тыш, ришвәтчелеккә каршы тору турында еллык хисаплар, норматив актлар, аналитик материаллар басыла.

Дәүләт гражданлык һәм муниципаль хезмәткәрләрнең һөнәри үсеше өчен республикада стажировка мәйданчыклары булдырылды. Татарстан Республикасы Юстиция министрлыгы базасында «Норматив хокукый актларга коррупциягә каршы экспертиза. Норматив хокукый актлар проектларын эшләү» юнәлеше эшли.

Республикада көнкүреш коррупциясен минималь дәрәҗәгә киметү буенча да системалы рәвештә эш алып барыла. Гражданнарның мәгариф, сәламәтлек саклау һәм башка юнәлешләрдә ришвәтчелек күренешләре турындагы мөрәҗәгатьләренә мониторинг үткәрелә.

Татарстан – динамик үсештәге төбәк, ул үзенең инвестицион җәлеп итүчәнлеген арттыруга, сәнәгатьне модернизацияләүне тизләтүгә, инновацион потенциалны арттыруга юнәлгән. Әмма икътисадтагы барлык казанышлар ришвәтчелеккә каршы хәлиткеч көрәштән башка мөмкин түгел. Республиканың алга таба уңышлары һәр гражданның килешмәүчәнлегенә һәм принципиаль позициясенә бәйле булуына ышанам», – диелә Татарстан Республикасы Хөкүмәте рәисе мөрәҗәгатендә.