Иркутск өлкәсе мөфтиенә төбәк губернаторы исеменнән Рәхмәт хаты тапшырганнар
Иркутск өлкәсе мөфтие, төбәк иҗтимагый палатасы әгъзасы Фәрит хәзрәт Мингалиевка Иркутск өлкәсе губернаторы Игорь Кобзев исеменнән Рәхмәт хаты тапшырылды.
Ул Иркутск өлкәсе Иҗтимагый палатасының 2022 елдагы эшчәнлек нәтиҗәләре һәм 2023 елга төп бурычлар каралган пленар утырышында катнашты. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.
Төбәк губернаторының беренче урынбасары Роман Колесов сәламләү сүзендә Иҗтимагый палатаның ролен билгеләп үтте. Ул шулай ук иҗтимагый һәм коммерцияле булмаган оешмаларның Иркутск өлкәсе үсешенә зур өлеш кертүен дә әйтте.
Иркутск өлкәсе Иҗтимагый палатасы күптәннән төбәкнең гражданлык җәмгыяте абруен яулады, аңа хөрмәт белән карыйлар. Палата унбиш ел дәверендәге үзенең актив эшчәнлеге белән иҗтимагый контрольнең иң нәтиҗәле субъекты булуын исбатлады, аңа хакимиятнең барлык тармаклары вәкилләре дә колак салырга әзер, диде ул.
15 ел дәвамында Иҗтимагый палата хакимият һәм җәмгыять диалогы өчен төп мәйданчык булып тора. Чараның тантаналы өлешендә Иркутск өлкәсе Иҗтимагый палатасы әгъзалары һәм экспертлары федераль һәм региональ дәрәҗәдәге бүләкләр белән бүләкләнде.